ياذيب يامحبوس.. مثلك لنا ذيب

يا ذيب يا محبوس مثلك لنا ذيب=مطوي عليه القيد خلف القضيبي
سجنة شرف تاجٍ على الراس ما تعيب=نشهد بها والله علينا حسيبي
يا ذيب والقضبان حولك مناصيب=ذكرتني وخلّيت قلبي صويبي
في ذيبنا يا ذيب طبعك وأساليب= سطوتك واقدامك وفكرٍ لبيبي
ما فيك يا ذيب الحديقة عذاريب =أنته قوي البأس فعلك مهيبي
حسوتك للحرّاب ناب ومخاليب=وطيبك لنفسك يوم تكسب عصيبي
وحنا لنا ذيبٍ يمينه مكاسيب =ولأهله وجيرانه بقسمه نصيبي
يعجبك بالفزعة يبش التراحيب =قلبه عرين الطيب لون الحليبي
مثل المطر لا هل صافي المشاريب =ان حل بالبيداء ثراها خصيبي
وان ثارت الهيجا وشيل المزاهيب =بأول خطوط النار يِصلى لهيبي
لبّى نداء البلقان وأوفى المواجيب= ورابط على القوقاز ذاك الشعيبي
يهوى الشهادة في علو المراقيب=ومن قال أنا مسلم يجي له نسيبي
لعل تكتب له حسانيه بالغيب=من عامل المولى ربح ما يخيبي
ويا ذيب لك بالحبس راعي واصاحيب=وفي ديرة الإسلام ما أنته غريبي
وغيرك غريب الدّارعند الأجانيب=مصيره معلق بيد الصليبي
حريته مطلب وفيها مصاعيب=لو تشترى بالمال رقمه نجيبي
يا ذيبنا أخذوك غدر وبالاعيب= ما أنته أسير الحرب أسير الصحيبي
لو جوك بالميدان تدمي المضاريب=مثلك وشرواكم عذاب الحريبي
تكالبوا أهل النفاق المذانيب= وعلى فتات المال خان القريبي
يا بعدهم عن درب الإسلام والطّيب =من يخذل المسلم نذم ونعيبي
ويا أمة المليار نصفك أكاذيب =القدس ناداكم وماله مجيبي
وبالرافدين الدم سيّل مرازيب =وأفغان والشيشان وضعٍ صعيبي
يطمع بنا حتى صغار الدّباديب=صكت على القصعة وتدبي دبيبي
عارٍ به التاريخ دوّن مكاتيب =أجيال يروونه شباب ومشيبي
يا معتصم ما تسمع الصوت وتجيب =وينك صلاح الدين قدسك سليبي
ما عاد به بالحي نار ولواهيب=تحرق لنا شارون وبوش الغضيبي
يا مسلمين أصحوا وهبّوا مطاليب =عدوكم ينهب حماكم نهيبي
مع العدو ما عاد ينفع تطابيب=لابد من جيشٍ يسد المغيبي
شعاره الإسلام يدّب تواديب=وسلاحه الإيمان ماله غليبي
جيشٍ يبا الجنات ولها خطاطيب=يقدمون الموت على الحبيبي