يقول من عدى على راس عالي=رجم طويل يدهله كل قرناس
في راس مرجومٍ عسير المنالي=تلعب به الأرياح مع كل نسناس
في مهمةٍ قفر من الناس خالي=يشتاق له من حس بالقلب هوجاس
قعدت في راسه وحيدٍ لحالي=براس الطويل ملابقه تقل حراس
متذكر في مرقبي وش غدالي=وصفقت بالكفين ياسٍ على ياس
أخذت اعد أيامها والليالي=دنيا تقلب ما عرفنا لها قياس
كم فرقت ما بين غالي وغالي=لوشفت منها ربح ترجع للافلاس
يقطعك دنيا ما لها أول وتالي=لو اضحكت للغبن تقرع بالأجراس
المستريح اللي من العقل خالي=ما هو بلجات الهواجيس عطاس
ماهوب مثلي مشكلاته جلالي=أزريت أسجلهن بحبر وقرطاس
حملي ثقيل وشايلة باحتمالي=واصبر على مر الليالي والاتعاس
وارسي كما ترسي رواس الجبالي=ولا يشتكي ضلعٍ عليه القدم داس
يابجاد شب النار وادن الدلالي=واحمس لنا يابجاد ما يقعد الراس
ودقه بنجرٍ ياظريف العيالي=يجذب لنا ربعٍ على اكوار جلاس
وزله إلى منه رقد كل سالي=وخله يفوح وقنن الهيل بقياس
وصبه ومده يا كريم السبالي=يبعد همومي يوم أشمه بالانفاس
فنجال يغدي ما تصور ببالي=وروابع تضرب بها اخماس واسداس
لاخاب ظني بالرفيق الموالي=مالي مشاريهٍ على نايد الناس
لعل قصر ما يجيله ظلالي=ينهد من عال مبانيه للساس
لاصار ما هو مدهل للرجالي=وملجا لمن هو يشكي الضيم والباس
بحسناك يامنشي حقوق الخيالي=ياخالق أجناس ويامغني أجناس
تجعل مقره دارس العهد بالي=صحصاح دوٍّ دارس مابه اوناس
البوم في تالي هدامه يلالي=جزاك ياقصر الخنا وكر الادناس
متى تربع دارنا والمغالي=وتخضر فياض عقب ما هيب يباس
نشوف فيها الديدحان متوالي=مثل الرعاف بخصر مدقوق الالعاس
ونثير على البيدا سوات الزوالي=يشرق حماره شرقة الصبغ بالكاس
وتكبر دفوف معبسات الشمارلي=ويبني عليهن الشحم مثل الاطعاس

- وجدتها ,, وجدتها

- كل عام وأنت ......

- قصيدتي (2) : عبيرٌ ,, خالد